NOTÌZIAS E CONTOS Sàpadu 25 de su mese de Santu Andria, in sa domo de su mele de Monte est istadu presentadu su libru de Dionigi Panedda “Il Giudicato di Gallura. Curatorie e centri abitati”, libru chi est istadu torradu a imprentare e publicadu a nou cun s’annanta de sa cartografia fata dae Francesco Mameli.
In sa serada de sàpadu ant faeddadu espertos de importu mannu, cumintzende dae sa vida de s’autore finas a sas temàticas chi tocant sos giuigados de Sardigna, cun atentzione manna pro cussu de Gaddura. A organizare s’eventu b’at pensadu s’assòtziu Erèntzia chi at dadu a su professore Gianni Mutzu su còmpitu de presentare e moderare sa serada.
Ant partetzipadu Dionigi Pala, nebode de Dionigi Panedda, chi at faeddadu de sa vida e de sa biografia de s’autore. A pustis est tocadu a sa vice presidente de s‘assòtziu Francesca Meloni faeddare de s’istòria de sa Sardigna e de s’istrutura de sos giuigados in s’ìsula. Imbetze su dutore archeòlogu Marco Agostino Amucano at faeddadu de sos cuntatos e de sas maneras de comunicare intre a sos giugados de Gaddura e de Torres, lende comente logu de mesu sa bidda de Monte.
A s’agabbu de sa serada sa zente at pòtidu iscurtare cun piaghere mannu sas melodias sonadas dae sos piseddos chi sighint s’iscola de sonete organizada dae s’assòtziu “Sos Misureris”. “Una serada de importu mannu pro fàghere connòschere s’istòria e sa cultura sarda – at nadu Francesca Meloni –. Semus cuntentos meda de sa partetzipatzione, de s’interesse e de s’atentzione mustrada pro sos argumentos tratados in custa bella serada. Torramus gràtzias a s’amministratzione comunale de Monte, a sos espertos e a totu cussos chi ant partetzipadu”.
